Акафист святей великомученице Варваре, поемый со страхом Божиим и всяким умилением в годину всеобщих пагубных поветрий и прочих бедствий. Творение кир Рафаила Кавсокаливита

Кондак 1. Глас 8

Мученицу Христову и невесту нескверную, деву прекрасную и присную деву песньми венчаим Варвару многострадальную, яко избавляющую от всяких пагубных болезней к иконе ея с любовию припадающих и вопиющих: Радуйся, отроковице богоневестная.

Икос 1

Ангели в вышних и человецы долу, не могуще воспети по достоинству святую Варвару, овии невещественными умы, овии же вещественными гласы, устрашаемся, вопиюще тебе радостию таковая:

Радуйся, еюже Троица сияет, радуйся, еюже прелесть изнемогает.

Радуйся, богословившая Троицу светом, радуйся, в бане источник изливающая исцелений.

Радуйся, яко возлюби Троица доброту твою, радуйся, яко принеслася еси чистая Троице.

Радуйся, скверну двоицы сокрушившая, радуйся, зарю Троицы проповедавшая.

Радуйся, еюже крест изображается, радуйся, еюже враг уничижается.

Радуйся, отроковице богоневестная.

Кондак 2

Видящи благочестно Дакия сущую в России девственную твою, чистая, скинию и преславных чудес множество, с нею песньми тя благоговейно почитает, и мы купно с ними трибожественную песнь богословим: Аллилуиа.

Икос 2

Разум неуразуменный рождшему открыти желающи, вопияше Варвара к зиждущим: третье оконце посреде двою в бане хощу аз устроити. Темже всяк видяй свет Светодавца глаголет ей сице:

Радуйся, света Троичнаго проповеднице, радуйся, всяческих добродетелей чаше.

Радуйся, исцелений источниче приснотекущий, радуйся, неисцельно болящих восставление.

Радуйся, доброто сокровенная, миро излиянное, радуйся, благоцветный раю и благодати цветниче.

Радуйся, честная Варваро, победоносная дево, радуйся, избранная предобрая Христова невесто.

Радуйся, свет Троицы узревшая, радуйся, прелести огнь угасившая.

Радуйся, мудрствующих божественная чтилище, радуйся, отца нечестиваго жертво.

Радуйся, отроковице богоневестная.

Кондак 3

Силою Троическою яко мужески твердое зрящи Иулиания на поприще страшнейшем женское твое естество, и сия устремляется на подобная и подъемлет блаженная страдания, вопиющи с тобою: Аллилуиа.

Икос 3

Имущи Россия тело твое божественное, восписует ти похвальная. Мы же, главою твоею богатящеся, како не венчаем тя сими и песньми, яко стрелами, не поразим велиара, таковыми?

Радуйся, Адама благоцветное прозябение, радуйся, Евы бесстрастный цвете.

Радуйся, крест рукою начертавшая, радуйся, на нем Пригвожденнаго прославившая.

Радуйся, вредящыя нам духи отгоняющая, радуйся, чудес потоки щедро источающая.

Радуйся, твердейшая и меди, и железа, радуйся, честнейшая и злата, и сапфира.

Радуйся, маслино Божия златоветвенная, радуйся, язву погибельную решащая.

Радуйся, ярость Божию утишающая, радуйся, нас с Богом примиряющая.

Радуйся, отроковице богоневестная.

Кондак 4

Бурю и треволнение, гнев же и скорби, богодвижно нас поражающыя и противу нас пламенеющыя, и предающыя ны духовом пагубным, утишаеши, всемилостивая, и пети вся ны подвизаеши: Аллилуиа.

Икос 4

Слышаша зиждущии повеление богоглаголивыя отроковицы, и третие приложити оконце во образ Света Трисиянного, Отца, Сына и Духа Святаго, Имже мы просветившеся, вопием ей таковая:

Радуйся, Света Трисиятельного дщи, радуйся, душ светоприемных светильниче.

Радуйся, Отца и Сына жилище, радуйся, Духа Святаго алавастре.

Радуйся, богонаученная, яко витийствуеши о Троице, радуйся, яко неуязвима пребываеши во искушениих.

Радуйся, богоглаголивая дево и мученице, радуйся, венценосица истинная сих ради явльшаяся.

Радуйся, красное востока озарение, радуйся, светлое запада сокровище.

Радуйся, еюже погибель отгоняется, радуйся, еюже казнь отлагается.

Радуйся, отроковице богоневестная.

Кондак 5

Богоглаголивая Варваро, Богочеловека Слова дщерию по благодати нарицаешися. Темже бессмертия сподобляеши всех боголепно ти прибегающих, смерти тленныя и вечныя избавляющи, вопиющих: Аллилуиа.

Икос 5

Видеша небесных премирнии умы рождшаго, чадоубийственною рукою неистовствующа сия чаду, и раны ей наносяща нещадно, и содрогающеся зверскаго образа, сладчайше ей возгласиша:

Радуйся, яко тело предала еси на биения, радуйся, пострадавшая любве ради Жениха своего.

Радуйся, узы дочерния презревшая с радостию, радуйся от земных к небесем чистым пресельшаяся.

Радуйся, яко радуются ангели твоему терпению, радуйся, яко плачут демони своего ради поражения.

Радуйся, лжу прелести обличившая, радуйся, чистоты печать сохранившая.

Радуйся, бесплотных красное радование, радуйся, Христово дивное благоухание.

Радуйся, отроковице богоневестная.

Кондак 6

О худший из пастырей, иже Божию агницу предаеши зверю рождшему, како не избрал еси, окаянный, жалости к таковому чаду и милости? Избави нас, Христе, таковаго зверообразия, ведущих пети: Аллилуиа.

Икос 6

Осияваеши запад, зашедши на востоце, озарила бо еси его пеленами и облистала нас древле, наслаждающихся благими твоими, всечистая, чудесы и мощей богатством, и вопиющих таковая:

Радуйся, девства доброто, радуйся, ветве голубиная.

Радуйся, отеческаго неистовства не устрашившаяся, радуйся, языческое безумие возненавидевшая.

Радуйся, телесное благородие предавшая на раны, радуйся, цвете юности и мудрости зрелость.

Радуйся, от терниеподобнаго корене прозябший шипок, радуйся, страданий класе, носяй прекрасный плод.

Радуйся, честных дев воздаяние, радуйся, чистых душ благоухание.

Радуйся, пагубу от нас прогоняющая, радуйся, ярость Божию умилостивляющая.

Радуйся, отроковице богоневестная.

Кондак 7

От язвы губителя века настоящаго и врага льстиваго избави твоими богоприятными мольбами всех приходящих к тебе с любовию и преселяющихся к житию лучшему, зовущих: Аллилуиа.

Икос 7

Новую Феклу зрящи первомученица Фекла, приявшую гору разверзшуюся, чудодействовавшу Христу и сохраньшу тя, яко неприкосновенну, от отцовскаго неистоваго гнева, мановении незримыми плескаше таковая:

Радуйся, нарде Жениха Христа, радуйся Ноева голубице.

Радуйся, несотворенныя доброты возжелавшая, радуйся скоротекущую славу поправшая.

Радуйся, восполнившая жертву Исаака, радуйся, отца своего, Велиарова Авраама, испепелившая.

Радуйся, всеоружием креста огражденная, радуйся, своеручно отцем в жертву принесенная.

Радуйся, агнице Христова непорочная, радуйся, Материю Его данное врачество.

Радуйся, в отроковицах чистых изрядная, радуйся, превосшедшая премудрую Авигею.

Радуйся, отроковице богоневестная.

Кондак 8

Странное видение зрю: усекаемым сосцем твоим, ум на небеса возносила еси. Сего бо ради Пренебесный плотоносный явися на земли Человек, да тя мужемудренную небесномудрую покажет поющим: Аллилуиа.

Икос 8

Вся еси ближняя, яко добра, яко красна и порока в тебе несть никакогоже. И в чертог шествуеши прекраснаго твоего Жениха с мудрыми, мудрая дево, отроковицами, от нихже слышиши таковая:

Радуйся, чистоты крине благоуханный, радуйся, неистовство отцовское превозмогшая.

Радуйся, девства ангельскаго изображение, радуйся нетленных дев радосте.

Радуйся, ты бо возжелала еси Жениха твоего Христа, радуйся, ты бо свещу свою украсила еси светло.

Радуйся, приведенная Царю дево, радуйся, произбранная во благоухание мира.

Радуйся, агнице, волею пожершаяся, радуйся, светильниче, елеем горящий.

Радуйся, драхмо, юже Бог во плоти обрете, радуйся велия сладосте ангелов.

Радуйся, отроковице богоневестная.

Кондак 9

Где пасеши, Женише, уязвляема желанием, вопияше на поприщи мученица. Раны бо мучений безмолвно терпящи, глаголала еси: сецыте, терзайте, с радостию бо иду к Жениху моему, да со ангелы пою: Аллилуиа.

Икос 9

Силу вышеестественную Варвары зрящи, необычную естеству женскому, ублажаше ю невидимо мученицелюбивая деволюбивая Богомати, вопиющи тако:

Радуйся, богокрасное божественное чудо, радуйся, самопожершаяся жертво.

Радуйся, богоборцев богозданный серпе, радуйся, безбожия богозванная разорительнице.

Радуйся, цвете девонасажденный, страданьми украшенный, радуйся, доброто, от Бога прославленная.

Радуйся, премудросте Божия, безбожных умертвившая, радуйся богопроповедание, боголюбивых утешающее.

Радуйся, юже Бог скоро слышит, радуйся, еюже Бог дивен является.

Радуйся, боговидных страданий видение, радуйся жертвы Богу богомудренно приносящая.

Радуйся, отроковице богоневестная.

Кондак 10

Заступницу стяжавши Божию Матерь, нетления вину, Ходатаицу нашу к Богу, пренетленную воистинну, о нетленная, преселилася еси, естество забывши и Той вопиющи: Аллилуиа.

Икос 10

Треми оконцы, дево Варваро, повелевши баню осветити, таинственную купель показала еси, Пресветлою Троицею просвещаемую и души всех очищающую, ихже Троица подвиже тебе вопияти:

Радуйся, страстотерпцев славо, радуйся, богословов учительнице.

Радуйся, угроз и казней не убоявшаяся, радуйся, узы страстей растерзавшая.

Радуйся, яко удивила еси чины ангельския, радуйся, яко растерзала еси диавольская плетения.

Радуйся, вшедшая на браки Жениха, радуйся, венцы от Него приявшая.

Радуйся, сатаны козни уразумевшая, радуйся, плотскаго креста не устрашившаяся.

Радуйся, о нейже Троица радуется, яко о невесте, радуйся, юже Единица Едина прослави.

Радуйся, отроковице богоневестная.

Кондак 11

Высоту похвал превзыде воистинну слава девы Твоея, Спасе. Исповедание же наше прияв, ниспосли воздаяние Твое, благих Подателю, нам озлобляемым и вопиющим: Аллилуиа.

Икос 11

Светлою тя одеждею Христа ради облекшуюся, светоносный осия ангел и яко невесту преславную, нетления одеждею тя одевает, оттряс твое плотское дебельство и возглашая ти таковая:

Радуйся, изменившаяся божественным пременением, радуйся, страсть бесстрастно претерпевшая.

Радуйся, ветхаго совлекшаяся человека, радуйся в новаго облекшаяся Богочеловека.

Радуйся, яко блаженную кончину прияла еси мужески, радуйся, яко венец имаши мученический.

Радуйся, ранами мученическими преукрашенная, радуйся, венец неувядаемый носящая.

Радуйся, гласу Божию внимающая, радуйся, любве Его сосуде.

Радуйся, соединившаяся с Женихом твоим, радуйся, светом славы сияющая.

Радуйся, отроковице богоневестная.

Кондак 12

Яко ластовица прекрасная, подвизавшися на поприщи с Иулианиею славием, оставила еси отца яростнаго, возлетевши к Небесному Жениху паче всех желанному, Емуже поеши песнь: Аллилуиа.

Икос 12

Поют твои страдания святых лицы, яко видеша тя преукрашенную девством и мученичеством, и торжествующе возрадовашася купно, восплескаша, восхвалиша, воспеша, вопиюще таковая:

Радуйся, заре нетления, радуйся, сияние благочестия.

Радуйся, горлице прекрасная песни Соломоновы, радуйся, каплю искапающая благодати.

Радуйся, славу непреложную имущая на небесех, радуйся, мудрование непорочное отдавшая Единому Христу.

Радуйся, на брань противу врага ставшая твердо, радуйся, любовию Христу уневестившаяся.

Радуйся, еюже постыжден бысть льстивый, радуйся, еюже упразднися мучитель.

Радуйся, певцев твоих благое жребодаяние, радуйся от страданий губительства спасение. Радуйся, отроковице богоневестная.

Кондак 13

О дево и мученице, о Божия Слова невесто, дев и мучениц цвете, яко дерзновение стяжавши ко Препетой Царице, за нас Сию умилостиви, вопиюших: Аллилуиа.

[Сей кондак глаголется трижды.]
[Далее повторяем 1‑е икос и кондак:]

Икос 1

Ангели в вышних и человецы долу, не могуще воспети по достоинству святую Варвару, овии невещественными умы, овии же вещественными гласы, устрашаемся, вопиюще тебе радостию таковая:

Радуйся, еюже Троица сияет, радуйся, еюже прелесть изнемогает.

Радуйся, богословившая Троицу светом, радуйся, в бане источник изливающая исцелений.

Радуйся, яко возлюби Троица доброту твою, радуйся, яко принеслася еси чистая Троице.

Радуйся, скверну двоицы сокрушившая, радуйся, зарю Троицы проповедавшая.

Радуйся, еюже крест изображается, радуйся, еюже враг уничижается.

Радуйся, отроковице богоневестная.

Кондак 1

Мученицу Христову и невесту нескверную, деву прекрасную и присную деву песньми венчаим Варвару многострадальную, яко избавляющую от всяких пагубных болезней к иконе ея с любовию припадающих и вопиющих: Радуйся, отроковице богоневестная.

Молитва

Прему́драя и всекра́сная свята́я великому́ченице Христо́ва Варва́ро! Блаже́нна еси́, я́ко Преми́рная му́дрость Бо́жия плоть и кровь не яви́ тебе́, но Сам Бог Оте́ц Небе́сный, И́же тебе́, ве́ры ра́ди от неве́рнаго отца́ оста́вленную, изгна́нную и умерщвле́нную, в дщерь Себе́ возлю́бленную прия́т; за тле́нное земна́го име́ния насле́дие пло́ти нетле́ние дарова́; труды́ му́ченическия упокое́нием Небе́снаго измени́ Ца́рствия; вре́менное твое́ житие́, сме́ртию Его́ ра́ди пресече́нное, сицево́ю воспросла́ви по́честию, я́ко ду́шу с ли́ки Небе́сных вчини́ духо́в, те́ло же, на земли́ в хра́ме их а́нгельском положе́нное, а́нгелом запове́да сохрани́ти це́ло, че́стно и многочуде́сно. Блаже́нна еси́, Христу́ Сы́ну Бо́жию, Жениху́ Небе́сному, уневе́щанная Де́во, Его́же добро́ты твоея́ Рачи́теля име́ти жела́ющи, всю себе́ страда́нием, ра́нами, удо́в ре́занием и са́мыя главы́ усече́нием, а́ки тва́рьми дража́йшими, потща́лася еси́ украси́ти: да та́ко, я́ко жена́, ве́рна главе́ свое́й — му́жу, Христу́ ду́хом и те́лом соедини́шися неразлу́чно, глаго́лющи: обрето́х, Его́же возлюби́ душа́ моя́, удержа́х Его́ и не оста́вих Его́. Блаже́нна еси́, я́ко Святы́й Дух на тебе́ почи́л есть, и́мже духо́вными духо́вная разсужда́ти нау́чена, вся ду́хи лука́вствия во и́долех я́ко па́губныя отри́нула еси́ и Еди́наго Бо́га Ду́ха позна́вши, я́ко и́стинная покло́нница, ду́хом и и́стиною кла́нятися изво́лила еси́, пропове́днически глаго́лющи: «Тро́ицу чту, Еди́но Божество́». Сию́ Святу́ю Тро́ицу, Ю́же в животе́ и сме́рти испове́данием и страда́нием свои́м просла́вила еси́, умоли́ о мне, предста́тельнице моя́, я́ко да и аз всегда́ тро́йственною ве́ры, любве́ и наде́жды доброде́телию Ту́южде Свят́ую Тро́ицу почита́ю. И́мам свети́льник ве́ры, но пра́зден благи́х дел еле́а: ты, му́драя де́во, страда́льческую плоть твою́, кро́ве испо́лненную и ра́нами пролива́ющуюся, а́ки свети́льник иму́щая, даждь от еле́а твоего́, да тем душе́вную мою́ свещу́ украси́вши, сподо́блюся по тебе́ в Черто́г Небе́сный. Пресе́льник аз есмь на земли́ и пришле́ц, я́коже вси отцы́ мои́; благ ве́чных насле́днице и блаже́нная ве́чери в Ца́рствии Небе́снем прича́стнице, я́ко в стра́нствии жития́, Трапе́зы Боже́ственныя угоде́ния, си́це и во исхо́де от ми́ра жела́емаго сподо́би мя напу́тствования; и егда́ в коне́ц сном сме́рти начну́ усыпа́ти, косни́ся тогда́ изнемога́ющия пло́ти моея́, я́ко иногда́ А́нгел Илии́, глаго́лющи: воста́ни, я́ждь и пий: я́ко да благода́тию Боже́ственных Те́ла и Кро́ве Тайн укрепле́н преиду́ в кре́пости я́ди тоя́ дале́кий путь сме́рти, да́же до Горы́ Небе́сныя: и та́мо, Его́же ты чрез три окна́ ба́нныя пре́жде ве́рою Бо́га Тро́ицу узре́ла еси́, Сего́ ку́пно с тобо́ю лице́м к лицу́ да удосто́юся ви́дети и сла́вити Его́ в неконча́емыя ве́ки. Ами́нь.

Молитва 2

Свята́я великому́ченице Христо́ва Варва́ро! Моли́ с на́ми и о нас, раба́х Бо́жиих (имена), умоля́емаго от Своего́ милосе́рдия Бо́га, да ми́лостивно услы́шит нас, прося́щих Его́ благосты́ню, и не отста́вит от нас вся ко спасе́нию и житию́ ну́жная проше́ния, христиа́нскую же кончи́ну жития́ на́шего безболе́зненну, непосты́дну, ми́рну и Боже́ственных Тайн прича́стну да да́рует, да благода́тию Бо́жиею и твои́м те́плым предста́тельством, душе́ю и те́лом всегда́ здра́ви пребыва́юще, сла́вим ди́внаго во святы́х Свои́х Бо́га Изра́илева, не удаля́ющаго по́мощи Своея́ от нас, всегда́, ны́не и при́сно и во ве́ки веко́в. Ами́нь.

Помянник о здравии:
Братия Свято-Троицкой Сергиевой Лавры

Рабов Божиих:
Иеромонах Алексей

Тамара, Ольга, Лариса, Иоанна, Наталия, Александр, Наталия, Ярослав, Валентины, Наталии, Фотинии, Наталии, Татьяны.

Татьяны (Tatiana Lamiri Alaoui, Maroco)

Екатерины (Lalla Elisa Cathy Lamiri Alaoui, Maroco)

Македона (Moulay Rayyan Lamiri Alaoui, Maroco)